سياسة الخصوصية

إحنا مين

"المشترك الكوري" تطبيق وخدمة على الإنترنت للتحكم في مشترك كهرباء ذكي (MTTL-W01) من موبايلك أو الكمبيوتر أو المتصفح. الخدمة مصرية ومستقلة، والسيرفر بتاعنا في أوروبا.

إيه اللي بنجمعه

• رقم موبايلك (واسمك لو كتبته): التجربة المجانية ما بتطلبش أي بيانات. الرقم بيتطلب أول مرة تكتب كود اشتراك مدفوع، وبنستخدمه عشان نعرف حسابك ونكلّمك لو احتجنا.
• مفتاح أمان لكل جهاز. التطبيق بيعمل مفتاح جوه موبايلك أو الكمبيوتر أو المتصفح، والجزء العام منه بس هو اللي بيتبعت لنا. المفتاح نفسه ما بيطلعش من جهازك، وده اللي بيمنع أي حد يستخدم حسابك من جهاز تاني.
• بيانات المشترك: عنوانه (MAC)، وحالة كل مخرج، والواط والفولت والحرارة اللي بيبلّغ بيها كل كام ثانية. دي أساس الخدمة: التحكم، والاستهلاك، والمواعيد، والتنبيهات.
• الأسماء اللي بتكتبها للمشتركات والمخارج، ونوع الجهاز المتوصل، والقواعد والمواعيد، وأسعار الكهرباء لو كتبتها.
• عنوان اتصالك بالإنترنت وقت التسجيل وإضافة مشترك، عشان نتأكد إن المشترك اللي بيتصل هو بتاعك فعلاً، ونوقف أي محاولات استغلال.
• رمز الإشعارات (من Google Firebase على أندرويد، أو من المتصفح) عشان يوصلك تنبيه والتطبيق مقفول. ينفع تقفلها من التطبيق في أي وقت.
• إحصائيات استخدام عامة من Google Analytics for Firebase في تطبيق أندرويد: زي عدد مرات فتح التطبيق والشاشات اللي بتتفتح. ما بنبعتش فيها اسمك ولا رقمك ولا بيانات مشتركك.

إيه اللي ما بنعملوش

• ما بنبيعش بياناتك ولا بنديها لحد لأغراض تسويق.
• ما بنطلبش جهات الاتصال، ولا الكاميرا، ولا الميكروفون.
• صلاحية الموقع على أندرويد: أندرويد ما بيسمحش لأي تطبيق يشوف أسماء شبكات الواي فاي القريبة من غيرها. بنطلبها بس وأنت بتضيف مشترك، عشان نلاقي شبكة المشترك وشبكة بيتك بدل ما تكتبهم. ما بنقراش مكانك، ولا بنحفظه، ولا بنبعته لحد. (ويندوز له نفس الشرط لخدمات الموقع.)
• ما فيش إعلانات.

بنحتفظ بالبيانات قد إيه

• قراءات الاستهلاك بتتحفظ بالدقيقة عشان شاشة الاستهلاك والفاتورة.
• التنبيهات: آخر 200 تنبيه لكل حساب.
• حساب التجربة اللي ما اتوصلش بيه أي مشترك خلال 7 أيام بيتمسح لوحده.
• بعد ما تمسح حسابك بتتمسح بياناتك من السيرفر. بنحتفظ بس بعنوان المشترك (MAC) وإنه خد شهر التجربة، عشان الشهر المجاني ما يتكررش على نفس الجهاز.
• نسخة احتياطية يومية من السيرفر بتتمسح لوحدها بعد 7 أيام.

تمسح بياناتك إزاي

من التطبيق: الإعدادات ← حذف الحساب. أو شوف صفحة حذف الحساب لو ما قدرتش تفتح التطبيق.

الأمان

كل الاتصالات مشفّرة (HTTPS)، وكل طلب من جهازك موقّع بمفتاحه. المشترك نفسه بيتكلم مع السيرفر بالبروتوكول بتاع الشركة المصنّعة، وده مش مشفّر، لكنه ما بيحملش أي بيانات شخصية.

الأطفال

الخدمة لأصحاب البيوت، ومش موجّهة لأقل من 18 سنة.

التغييرات

لو غيّرنا حاجة مهمة هنا، هنكتب التاريخ فوق وهنقولك في التطبيق.

تكلّمنا

أي سؤال عن بياناتك: اتصل بنا.